張智霖向老婆撒嬌想換電話！靚靚神回一張相KO

張智霖（Chilam）向來都係愛妻號，錫老婆袁詠儀（靚靚）成為佢終身職業，好多時乜都問過靚靚先敢做。近日Chilam想換電話，佢知道口講問未必有用，就用群眾壓力喺社交網留言，希望靚靚答應，佢就問：「我可以換最新款的折叠屏嗎？」然後Tag咗靚靚個名。

網民見狀梗係食花生，話Chilam起碼要買多幾個名牌手袋先可以換到部「折叠屏」，靚靚就喺社交網Post電話空盒相，並神回：「@張智霖 給你！」靚靚帳號顯示佢已經用上最新型號電話，只留一個空盒畀Chilam，認真搞笑！