陳明恩帶埋混血B仔返港　酒店隔離慶祝結婚4周年

藝人陳明恩去年11月於澳洲誕下混血兒子鄭源（Jaydon Patrick），老公Eddy特意停工陪待產，眨眼間囝囝已經3個月大，一家三口日前已返港，現時身處於酒店接受隔離。

適逢尋日係佢同老公4周年結婚紀念日，雖然未能外出慶祝，不過Eddy都好識做，專誠訂花送畀老婆，並上載一家三口全家福到社交網，兩夫妻將囝囝夾喺中間面貼面，十分溫馨。

Eddy留言：「4周年結婚紀念日，第一次同個老婆仔同個仔喺隔離酒店度過，雖然冇得出街，但訂到束花，叫個好啲嘅外賣食餐飯，已經好有氣氛啦！呢一刻，源仔應該想講：爸爸媽媽，你哋恩愛我好開心，但其實有啲迫，可以畀啲空間我嗎！」