使乜靠App！陳奕迅揈頭扭頸似足玩特效

近日內地社交網好流行玩「螞蟻呀嘿」特效短片，簡單將自己個樣配以歌曲《Dragostea Din Tei》，特效就會將自己個樣變成唱歌加埋跳舞，真係好似平時拍片跳舞咁郁法一樣，非常搞笑！圈中唔少藝人好似袁詠儀同埋鍾欣潼等都有份玩，見到大家個樣變到面容扭曲，真係似足拍片咁款，幾可亂真！

不過要數，最識玩、玩得最靚嘅一定係歌手陳奕迅！平時諗頭多多嘅佢，趁住元宵佳節喺社交網上載整湯圓食嘅片，突然之間唱出「螞蟻呀嘿」歌詞，仲唔使靠特效，真人發聲，係咁揈頭扭頸唱歌，獲唔少網友大讚「條頸好靈活」、「有夠可愛的」等，為元宵佳節送上一點溫暖！