攞獎唔會停落嚟!張振朗謝東閔朱敏瀚繼續挑戰自己

20210227
東網電視
更多新聞短片
無綫三位力捧小生張振朗、謝東閔及朱敏瀚闖出天地,振朗與朱敏瀚之前分別於台慶頒獎禮奪得「最受歡迎電視男角色」及「飛躍進步男藝員」獎項,成績有目共睹。他們坦言之後會繼續沉醉於演戲,振朗坦言想挑戰「大肥佬」角色,而朱敏瀚亦指自己不能停下來,雖然只拍完《拳王》一陣子,但他都已心癢癢搵嘢做,不想浪費人生。而唱得、睇得又演得的謝東閔並未因之前歌唱的獎項而「撻」着歌癮,現時最享受的是演戲。
張振朗獲黎耀祥教化
入行將10年的張振朗上年一連播出5劇,狀態大勇:「好滿足,觀眾好接受每個角色,我初入無綫都做過好多小角色,當中好多都係喺後面走走吓,係呢幾年託賴有發揮。(唔遲?)唔遲,今年好開心拍《拳王》遇到黎耀祥,好多嘢係演員同演員之間先感受到,祥哥演戲嗰種細心、對演戲渴求同研究,真係令我好驚訝同佩服,好彩畀我遇到佢,大家一講演戲就撻着咁,有時睇到佢啲戲,我係會『嘩』!點解可以演到咁嘅,係一次好深嘅體驗,簡直為我上咗一堂預備班。(仲有幾多功力未學到?)好多,例如一句對白,祥哥話對白係結果,思考過程先係重點。」
問到短時間面對不同角色會否應付得很辛苦,振朗表示:「唔會喎!我好享受,我真係好鍾意演戲,入行一開始到依家冇變過,由訓練班開始,試過做練習時自己喊咗出嚟,如果早啲遇到祥哥我未必明到,依家開始明白,開始尋找自己。(出年進軍視帝?)我哋呢新一輩同佢哋有得爭吓已好開心,我唔會話好想攞,獎項唔會令人進步,反而想有角色挑戰吓,我想試吓增磅做肥佬,我都幾鍾意搵自己嚟搞,好好玩,為咗個角色先會有恒心去做,好似之前想達到大隻目的,每日食1KG雞柳,大約22、23條度,唔攪碎真係好難食到。(好易肥?)我唔易,之前真係要食到嘔先增到磅,辛苦嘅!但係觀眾反應畀自己嘅滿足感好大,好似拍《拳王》,我遇到好多問題,要上擂台,虛脫咁滯,但拍完自己有得着,覺得自己沉穩咗,可謂咬緊牙關面對挑戰!」
除了事業外,振朗的家人及女友楊偲泳對他來說都是一大支持,他不諱言家人永遠最緊要的:「我好鍾意屋企人,好鍾意同小朋友玩,呢排放假見多咗姪仔,我唔使同佢哋玩,喺側邊聽到佢哋玩我都好開心,佢哋好簡單,我就真係鍾意佢哋簡單。(自己會否好快生小朋友?)冇咁快,睇時機,(同女友有共識?)有,佢好明白事理,佢都好鍾意做演員,大家成日可以傾戲,好慶幸身邊啲人都好鍾意做戲,我哋就好似大家拖住大家隻手一齊行咁,好似朱敏瀚、蔡思貝。」
謝東閔棄唱歌繼續演好戲
而謝東閔上年都有多套劇集播出,包括《堅離地愛堅離地》、《殺手》、《香港愛情故事》等,更唱了不少劇集歌,反應相當不俗,他坦言:「都好開心,我同戴祖儀合唱嗰首點擊都過200萬,幾唔容易。(有冇撻着番想專職做歌手團火?)咁又冇乜呢個諗法喎!有得唱當然會唱,我想繼續做好啲戲,自己會擺多啲時間落去,依家拍緊《黯夜守護者》,今次個角色好唔同,係口才好好、聰明嘅才俊,同我完全唔同,幾大挑戰,之前拍《大藥坊》同展鵬合作,佢教咗我好多嘢,今次同佢都多戲,佢對我嚟講都係大前輩。其實有機會我都想好似佢哋咁操鑊甘,人生點都要試一次去另一個境界,希望試多啲唔同角色,獲觀眾認同。」
朱敏瀚好驚變下一個「大王」
朱敏瀚2009年入行,上年播了4套劇集,愈來愈享受做戲的他,笑言剛剛拍完《拳王》,未有工作這期間已覺得浪費時間,想搵嘢增值自己:「我都想搵啲人生興趣,唔想嘥時間,好似振朗鍾意電單車,陳豪鍾意咖啡,好有味道,希望唔好3分鐘熱度。」朱敏瀚以前經常做細佬角色,之前《反黑路人甲》陸秋一角令觀眾見到他成長:「觀眾緣真係要儲,之前入咗《都市閒情》做主持,初頭有啲意外,自己冇諗過做主持,我阿媽都問我點解會做《都市閒情》,但我好記得安德尊(大王)同我講,要珍惜呢個地方,一定可帶到嘢走,初頭我都有啲徬徨,係咪兩年後一定可以走呢?會唔會成為第2個大王?老實講我真係有咁諗,大王係好嘅,但做主持唔係我興趣,我當時同監製講,我希望我唔會喺度好耐,好似有啲寸寸哋,但監製好好,都有放番我出去拍劇。」問到攞獎後會否多了責任,他坦言不想大家只看到「陸秋」,希望還有更多的角色給觀眾留下深刻印象:「我成日講,我係電視撈飯,自細畀劇集影響好多,好想成為電視圈一分子,所以17歲我就入訓練班。」
三位「小生」都有一個共通點,就是有位圈中女友,大家都是愛得「大方」,張振朗與楊偲泳同樣喜歡演戲,問公司有冇給壓力時,振朗謂:「冇,本身我哋都好低調,所有嘢都係順其自然,都係畀人影到先發現。(公開後有冇影響?)又冇乜喎,冇乜所謂,依家呢個世代拍拖咪拍拖囉!依家大大方方認咗佢仲好,最緊要大家舒服,步伐一致,大家明白先係最重要。」
而謝東閔與朱智賢似乎有經歷後愛得更深,謝東閔謂:「我覺得公開同唔公開分別唔大,就算冇公開我都唔會專登避忌,照出街食飯,我唔係好介意,但都唔想觀眾專注我私生活,想佢哋專注我工作表現上。」朱敏瀚坦言與女友余思霆於日本旅行時被影到而公開戀情,他謂:「呢啲嘢唔會自己專登公開,影到咪順其自然囉!(女朋友有新聞又關你事,會否好煩?)最緊要大家有共識。」
場地提供:台北‧寬巷子@海港城