鍾培生不滿被消費引擂台戰 林作:我是要消滅你

20210228
東網電視
更多新聞短片
麥明詩舊愛林作同有「百億富三代」之稱嘅鍾培生早前成為城中熱話,繼林作撕爛鍾培生嘅拳擊賽事舉辦合約後、又爆出林作練拳訓練費風波,不過近幾日佢哋嘅百萬擂台戰好似冇咩聲氣,點知今日又再掀起口水戰!
話說鍾培生日前亮相無綫節目《#後生仔傾吓偈》,接受訪問時直言不滿被林作消費,又坦言兩人之所以交惡,事緣兩人都係12月23日生日,佢早已唔鍾意被人將佢同林作相提並論,今次面對林作先挑機,佢直言加上自己血氣方剛,才不惜下戰書,佢表示:「嗰日喺我最繁忙時間,突然好多人炸我inbox,同我講有人抽你水喎。心諗係邊個?又係你(林作)。我都同個PR講係咪要覆,佢話千祈唔好覆,最後我都血氣方剛,直接出咗個Post,就話『Let’s Do』!」
續指林作將會係佢遇過最弱嘅對手:「之前打過3場慈善比賽,同3個對手相比,佢係最弱嗰個,但呢次會係我練得最勤力嘅一次。其實我已經讓咗佢,佢應該重我10幾磅,但都唔介意。合約已經畀咗佢,唔簽就算,Move on,唔好再消費我!」而林作今日喺社交網留言反擊:「我不是消費你。我是要消滅你。一周內給大家一個交代。」