朱慧敏被指撞樣李幸倪即變臉　老公幫拖解畫

藝人朱慧敏與心臟科醫生陳良貴（Jason）今年1月拉埋天窗，近日兩夫妻拍住上，每逢星期日開直播，解答網民有關身體及心靈上嘅疑問。尋晚佢哋邀請好友王賢誌一齊傾偈，期間有網友留言指朱慧敏與歌手李幸倪（Gin Lee）撞樣，似失散多年嘅姊妹，她即冷笑表示：「係咩？」及後面色一沉，直指唔覺同任何一位藝人似樣，在旁嘅老公立即解圍：「我第一個印象咪朱慧敏囉。」及後再有網友指佢與雷頌德太太Jade似樣，佢就直言：「我唔覺囉，你見過佢真人就覺得一啲都唔似。」

讚王賢誌貼心

朱慧敏大讚王賢誌貼心，憶述有年生日相約對方睇欣宜演唱會，但因唔舒服食藥後唔知醒失聯，嚇得對方大為擔心，佢話：「嗰陣袁偉豪住我樓下，佢仲諗住打畀袁偉豪上嚟敲我門，睇我有冇事，好彩我最後醒咗。」