何依婷話喊就喊 胡鴻鈞羅天宇排隊拜師

2021年03月02日 23:15
東網電視
更多新聞短片
無綫重拍經典劇集《十月初五的月光》,何依婷、胡鴻鈞及羅天宇日前在流浮山開工,拍攝一場天宇暈倒地上的戲份,雖然滿地泥沙,但NG多次的他照樣碌地沙,相當敬業。
全劇沒有任何親熱場口的依婷拍得相當輕鬆,笑言日前一場失足撲倒天宇的戲份已算是最親密,她卻相當尷尬:「怕醜嘛!因為好近佢個樣,忍唔住問天宇可唔可以遠啲!(你喺第2套劇生擒鄭俊弘又冇事?)嗰個借位啫!我唔係接受唔到,係需要啲時間熱身。」由於劇集已拍攝到一半,2位拍檔不禁取笑她熱身後已煞科!
雖然較為「慢熱」,不過她的喊功就一流,胡鴻鈞笑說:「依婷情感上發揮係超強,佢係大情大性嘅女仔,唔使培養就可以喊!所以奉勸男士們如果見到佢喊唔需要太上心,可能佢見到隻蚊都喊得出,想請教佢點樣流出真摰嘅眼淚,見佢連白花油都冇用!」在旁的天宇亦加入戰團,揚言一直想拜依婷為師,令她哭笑不得!
天宇被指微調變V臉,同病相憐的胡鴻鈞表現興奮,笑言歡迎他加入,自言不時被揶揄,天宇沒好氣說:「糖妹叫我介紹醫師畀佢!其實睇番以前啲相真係過分,拍《愛.回家》時成日食雪糕,後來減廿幾磅先係依家咁。依家要Keep住,遲啲要拍半裸『色誘』胡鴻鈞戲份,盡量向6舊腹肌方向進發!」而胡鴻鈞指日前與張振朗突襲緋聞女友蔡思貝的直播節目,主要是想搵機會傾偈。