鍾嘉欣孖王君馨Busking　得10個人睇！

藝人鍾嘉欣最近不時拍片挑戰自己，繼早前跟小朋友學跳K-pop，呢次佢就搵嚟去年以獨立歌手身份出歌嘅好姊妹王君馨，齊齊到街上Busking（街頭賣藝），相當貼地。佢哋一口氣獻唱多首中、英文歌曲，期間更再次唱出王君馨結婚時，一班「處女黨」姊妹送畀佢嘅歌曲，回味當日溫馨畫面。雖然有華姐及港姐兩大美女坐鎮，不過由於天雨關係，最高峰時都只得10人圍觀，但仍無損2人雅興，照樣投入演出。