吳業坤亂行「東海道53次」頓悟人生：我又唔係咩旅遊達人！

歌手吳業坤為咗令佢日本Working Holiday（工作假期）留下美好回憶，決定由關西行去關東，挑戰「東海道53次」！經歷咗3日旅程，佢似乎已有所覺悟！

未講人生覺悟，就先講佢遇上嘅慘事，話呢兩日嘅洗禮都令佢瞓得唔耐，9點半自動波彈起身，心諗浸個落住雨嘅露天風呂會好正，點知11點出酒店就狂風大雨，佢以為自己好醒去超市買2個膠袋笠住，等對鞋唔好入水，不過5分鐘後膠袋入哂水，真係慘呀！

之後佢去到四日市，就去食好嘢，食飯時同居酒屋老闆傾開兩句先知，話東海道好少人會一口氣行哂，佢聽完之後喺度諗自己會唔會太戇居，做乜要行夜山，但佢飲多兩杯就諗通咗：「我又唔係咩旅遊達人KOL，為咗介紹呢條東海道，只不過我係想行就係咁簡單，有時成日都聽到人哋點點點，自己就不如點點點，搞到原本嘅計劃兩頭唔到岸，所以都係用番自己嘅節奏去做，戇居啲咪戇居啲囉，咁先係自己呀嘛！睇哂攻略跟足哂係可能係好方便，但自己去發掘先有樂趣嘅，行到幾多就幾多啦！」

就係咁第3日旅程，坤坤就行咗30KM！