【娛刺撈飯】3大理由!羅志祥翻身在望!

2021年03月03日 14:00
東網電視
更多新聞短片
如果要數2020年,娛樂圈最爆,最多人識嘅TERM,一定係「時間管理大師」,好多人都唔記得佢原名叫羅志祥喇!舊年4月,「小豬」畀前女友、網紅周揚青毀滅性分手,大爆佢「多人運動」,令「小豬」喺成個亞洲一沉不起,神隱咗10個月之後,阿「羅大師」宣布進軍網界,開佢第一條網上影片頻道,仲話今年會出新碟添。
喺華人地區,無論係男明星又好、女明星又好,喺感情路上行差踏錯,背住另一半搞三搞四之後,都好難企得番起身。唔計本身已經霉過腐乳嘅張致恆同周永恒,就連出道35年、攞過「最受歡迎男歌星」嘅許志安,22個月前偷食黃心穎之後,去到依家都仲係「壞緊」。女明星方面呢,命運都係一樣,豪放嘅黃心穎依然係零工作,而鍾意同人夫喺車食蛋糕嘅朱智賢,依家得閒到成日行山,喺個山頭仲多過喺錄影廠。
出軌嘅男女藝人,出事之後好多都石沉大海,當然係同形象破產有關啦,但更大嘅原因,係電視台同電影公司封殺佢哋,連份工都無埋,想翻身真係要等第二世。據台灣傳媒報道,羅志祥咁多年來紅遍兩岸三地,近年轉戰內地搵個盤滿砵滿,身家高達20億台幣,即係大約5.6億港紙,以佢雄厚嘅實力,加埋超勁嘅人脈,自己開公司綽綽有餘,所以佢根本無畀公司封殺嘅危險。而佢過去10個月,喺網上都好活躍,完全睇唔到佢有收山嘅念頭。
可以背住女友,喺咁多地方都有秘密情人,又有「時間管理大師」嘅美譽,咁多年來無論喺台灣同內地都撈得掂、吃得開,羅志祥點會唔係叻仔?啱啱傳出佢同周揚青可能復合,佢哋一個鋪美食相、一個又鋪減肥相,周揚青仲神神秘秘話「希望今天做出的決定在未來永不後悔」,睇嚟「小豬」冧女係有一手,如果佢真係氹到前女友復合,由「多人運動」變番「二人運動」,嚟一招「浪子回頭」,雖然冇可能即刻變情聖、冇可能即刻收復失地,但成個牌面都唔同晒啦係咪先?
同埋「小豬」依家復出第一擊,唔係拍電影唔係出新碟,而係喺網上出片,佢除咗可以最少嘅成本,去拍自己最想嘅要嘅嘢之外,仲可以喺網上慢慢煲人氣。你諗下,如果佢係仰人鼻息嘅二線明星仔,分分鐘畀一班師奶觀眾,嘈到電視台都唔敢播佢啲劇;但網上世界完全唔同,只要大家去過討論區,網友最鍾意嘅就係唱反調,明明本身件事負面居多,但都鍾意拗到變正面;唔講到咁深入,網上世界嘅特色,本身就係可以容納更多唔同嘅藝人、節目同埋聲音,講到要搞笑做綜藝,「小豬」嘅能力根本唔使懷疑,佢拍嘅片肯定有質素,佢持之以恆畀到好嘢觀眾,要翻身難度就大減,到時再睇形勢出碟,基本上處於不敗之地。
其實好多外國明星,都周不時傳出性醜聞,只要你唔係好似奇雲史帕西咁傳出狎玩男童,好多時潛水一排就洗到白,《摘星奇緣》嘅曉格蘭特周街召妓,最後都無影響星途,依然大紅大紫。新時代年輕人有新角度,加上佢本身有實力,羅志祥未必會「小豬」變「死豬」。同埋作為花生友,都想羅志祥彈得返起啦,可能過多排佢又整單「180人超激大運動」,到時又周地花生啦!