譚詠麟High爆玩Poolside Party　竟然不敵童顏張智霖

依家疫情問題搞到大家過時過節只可以低調慶祝，就有一位網友晒出喺私人會所開生日P，不過重點唔係個壽星，而係佢竟然請嚟一大班圈中重量級藝人出席，包括有譚詠麟、張智霖、黃宗澤、曾志偉等，現場更有Live Band於泳池旁開私人演唱會，直頭見到「富貴」兩隻字，壽星即被網友猜測身份非富則貴！

笑到見牙唔見眼嘅壽星，佢就為每位藝人拍片，當中就見到譚詠麟表現High爆，佢先為主角大唱生日歌，仲拎埋對方部電話自拍大頭送祝福，更將電話環拍全場，可見場內有10多人參與今次私人Party。之後再唱《講不出再見》時更加配上誘人舞技左扭右擰，風騷爆燈，佢仲飲到面紅紅，比富婆壽星更加Hyper！

不過似乎壽星最愛係張智霖，為對方拍低高歌《今生今世》，又見到曾志偉更在旁打拍子，十分陶醉，並留言狂讚男神靚仔，自己都好羨慕袁詠儀可以嫁到個好老公。至於黃宗澤唱《風繼續吹》時，富婆竟直言唔太欣賞。

另又有網友晒出譚詠麟現身另一場合嘅片段，見現場有小朋友即席獻唱《講不出再見》，譚詠麟就露出「慈父般的微笑」，場面溫馨。