拒做黐身女友!伍樂怡保住「初吻」等顧家Mr. Right

2021年03月07日 21:01
東網電視
更多新聞短片
參選港姐時被封為「仙氣李若彤」的伍樂怡(Kelly),實際上是個外柔內剛的女生,外表柔弱,性格卻硬淨有主見,她說:「我比較隨和,可以話冇乜脾氣,但都有自己嘅主見,遇到唔滿意都會出聲㗎!」她喜歡的男士也不一樣,不會着眼外表,認為孝順、愛錫家人最吸引:「唔使花樣男子,最緊要感覺舒服、穩重。」她形容自己是一個不錯的女友,不會黐身,拍拖亦不會Check住男友,大家最重要是信任,若然沒有信心,疑神疑鬼一齊也沒意思。
密集式拍劇
身為無綫小花的Kelly,去年一口氣拍了4套劇,包括《超能使者》、《兒科醫生》、《刑偵日記》和《金宵大廈2》,相當充實。密集式實戰拍劇,對新人來說是最好的訓練,她說:「好有挑戰性,4個角色都有唔同發揮,最深印象係《超能使者》,監製要求好高,好多細節都慢慢教我,戲裏面同唐詩詠最多對手戲,佢好用心提點我好多注意唔到嘅地方。」
守得住螢幕初吻
Kelly在《超》劇飾演一個傻頭傻腦的笨拙角色,她說:「唔知係咪太入戲,停機之後繼續做咗好多傻嘢,畀大家笑我好襯呢個角色,其實我唔笨㗎,哈哈!」雖然連拍4劇,她暫時仍守得住螢幕初吻,在《金》劇只被丁子朗輕輕錫面,她說:「將來要拍咀戲都OK,最緊要係啱角色,因為拍緊戲就唔係你自己,係個角色。」
此外,創立了一個滑水服品牌的Kelly,近期開始設計太陽眼鏡,她說:「因為我成日唔見太陽眼鏡,好貴好心痛,所以想做啲價錢實際又好睇嘅,同朋友傾傾吓就開始合作,唔係諗住賺大錢,做嘅生意都係由興趣開始。」