鄭爽新片被除名頭像變黑白　連舊綜藝都被捽走靚樣

內地女星鄭爽陷代孕風波後事業一蹶不振，被指為「劣迹藝人」嘅佢雖曾有傳可以申請復出，不過佢依然未走出封殺困境，近日電影《1921》官宣女演員名單，當中就有主演倪妮、劉詩詩、歐陽娜娜、佟麗婭等17位女星，陣容非常龐大，不過網友就發現早於拍攝時，花絮中就出現過鄭爽，如今新片被除名，似乎7月上畫時佢嘅鏡頭都好大機會被刪走。

此外，有網友發現，鄭爽偷偷將自己社交網頭像變為黑白，令粉絲非常擔憂。

而早前鄭爽被封殺後亦影響早前嘅一系列曝光，佢早前參與錄製綜藝節目《王牌對王牌》中，有網友重睇節目時就發現鄭爽鏡頭被打格仔，節目組更不惜剪到節目支離破碎都唔要畀鄭爽「出鏡」。