余德丞攬實勁親密！丁子朗：好驚佢周圍郁

藝人丁子朗與余德丞於無綫新劇《青春不要臉》演一對出生入死的好兄弟，日前拍攝一場余德丞鼓勵對方追夢的戲份，劇組更安排二人踩單車，前者更攬到丁子朗實一實，非常親密。

劇集背景是80年代，劇組為配合故事，專程找來一架歷史悠久的單車，惟單車上的煞車掣因日久失修已失靈，最後要出動工作人員充當人肉擋箭牌，把車子弄停，丁子朗說：「因為我哋要踩斜路，來來回回好多次，最辛苦係落車冇煞車掣，都幾驚險，好在最後都順利完成。（同德丞咁親密！）我都係第1次同男仔咁樣，因為好驚佢周圍郁，我仲難攞平衡，咪叫佢索性攬住我囉！」

唔係Boy's Love

而余德丞似乎十分享受攬着丁子朗，對該場戲大呼好玩：「都幾得意，係一次幾好嘅體驗，但我哋係手足之情，並唔係Boy's Love嗰隻，哈哈！劇入面我同伍樂怡、劉穎鏇有感情線㗎！」