譚玉瑛唔羨慕周星馳梁朝偉爆紅

經典兒童節目《430穿梭機》曾培養出無數巨星，包括周星馳、梁朝偉、鄭伊健及朱茵等，主持人之一嘅譚玉瑛近日接受電台節目訪問，佢表示從冇羨慕過周星馳同梁朝偉等舊同事現時大紅大紫：「根本諗都冇諗，做呢行就會明白，你就係你，同樣你做佢嘅嘢，你都未必有佢嘅成就，因為你唔係佢，見佢成就咁大，曾經做過同事都會開心，我自己都好好，從來唔需要羨慕人。」

主持人問到周星馳係咪鍾意整蠱細路？佢表示：「佢嗰種整蠱係因為冇當你係細路，冇刻意呵護，鍾意就睬吓你，如果佢覺得你講嘢冇意思，藐吓你就行咗去，有人見佢打細路，我就冇見過。」問到鍾唔鍾意小朋友？佢坦言：「我唔憎，哈哈！我真係冇特別鍾意小朋友。」