爆狄龙拍戏晕低　谭俊彦下令息影：健康真系好紧要！

艺人谭俊彦生于演艺世家，父亲是金马影帝狄龙（原名谭富荣）、母亲陶敏明亦同为演员，他曾表示入行后因经常被冠以“狄龙个仔”的称号而压力爆煲，更有段时间拒绝父子合照。他现时压力相对减轻，明白到父亲一直以来为他付出不少，在新进星二代身上更见到自己的“影子”︰“前排我睇马德钟个仔，首先唔好评佢演技，第1套系冇人识做戏，一睇网民啲评论，都话‘梗系老窦搞掂咗啦！’喂，大佬，你识佢咩？觉得呢啲咁嘅压力，睇到报道心都痛。”

虽然谭俊彦放下对父亲的“成见”，但他表明不恨父子档同剧演出，甚至只是客串都坚决Say No，全因狄龙一次意外晕倒，响起“警号”︰“依家唔好啦！尤其呢几年我睇到好多老前辈拍完剧就走咗，Lily姐（梁舜燕）、权权（曾伟权），觉得身体健康真系好紧要。我爸爸前几年喺内地拍戏无端端晕咗！佢热得滞又唔除衫，40度拍古装晕低咗，咁点算呢？即刻饮‘正气水’先醒番，我就话‘你以后唔好再去拍’。”

他又有感老一辈演员自我要求高，怕父亲承受不了时间的“洗礼”︰“佢依家记性冇以前咁好，演员嘅自尊好紧要，有好多人都唔锺意NG好多次，见到好多老前辈以前口齿伶俐，10版纸全部讲晒，依家可能讲两句就‘对唔住呀，我今日唔知点解会咁。’我哋嗰辈，或者前面嗰辈大家会尊重佢，但你分分钟嚟个20岁嘅（演员），我识你狄龙边个呀？老嘢你做好啲啦！我唔要佢承受呢样嘢！佢享儿孙乐就OK啦，有时睇佢同我个仔出去个画面好开心，个仔好似我，畀佢重拾以前某啲遗失咗嘅时光，后生嗰时忙住拍剧、做嘢冇时间相处。”

他决意要求父亲退下火线，另一边厢又放宽一对仔女在“公仔箱”亮相，闲时可出镜︰“去《Think Big天地》呢啲儿童节目玩吓、做吓嘉宾系好嘅，因为可以同人倾吓偈。拍戏就唔好，会太快将佢哋嘅童真攞走晒，因为要做出嚟取悦人，唔可以话‘做得叻就畀你打机’咁样嘛，所以暂时演员就唔好啦！”

每当提起小朋友，谭俊彦即一脸幸福，并指最近与仔女一同睇新剧《失忆24小时》，竟有意想不到的结果︰“虽然系喜剧，但头几集嗌交戏份多，个女接受唔到父母离婚呢样嘢，跟住就喊！之后我畀人打，佢又问点解，我觉得呢啲系我嘅童年阴影，好似喺佢身上再发生。我细个系睇我爸做戏杀人，又系咁喊！”他笑言新剧角色“蒙一言”性格直戆、天真烂漫，与自己性格差天共地，惟有在小朋友身上取经，才成功“返老还童”！