周揚青晒30層鞋櫃　夠買千萬豪宅

羅志祥舊愛、內地網紅周揚青曾喺社交網炫耀獲爸爸大手筆送豪宅做生日禮物，豪宅更有一間星空影院，豪到咁，當然成為網友花生話題，而衣帽間都超級奢華，分分鐘大過你屋企個客廳！

日前佢網晒同閨蜜喺衣帽間影嘅chok照，留言話：「球鞋女孩們的日常」。相中佢哋身後嘅鞋櫃，唔少網友都話勁有「璀璨帝國」嘅感覺，每個鞋櫃「樓高」10層，單憑相片顯示有3個鞋櫃，即係總共有30層，層層放有各式各樣、嚟自唔同高級品牌嘅鞋，仲有射燈照住，十足名店專櫃咁。有行內人目測，佢收藏嘅鞋，總值逾1千萬元人民幣（約1千2百萬元港幣），夠佢喺北京買間獨立屋！

成個衣帽間好似百貨公司一樣，天花板掛有兩盞水晶吊燈，仲有十幾個玻璃櫃，分別放置四季衣物、以及擺放名牌手袋嘅專櫃，數量同款式可以話一應俱全，其收藏品之多真係睇到眼花撩亂。