無綫擁有版權！歐錦棠上載《精武門》片段被要求下架

藝人歐錦棠近日喺影片頻道，分享當年佢有份嘅亞視劇集《精武門》幕後花絮，回顧佢同甄子丹對打嘅場面，但上載唔夠1日，佢喺社交網指接獲無綫投訴，指《精》版權屬無綫所擁有，要求佢立刻將相關嘅劇集內容刪走和下架，佢惟有將片段打格，之後再上載短片畀網友欣賞，佢留言：「是咁的，尋晚上線嘅最新一集《乜乜棠水舖》，今日被下架，原因係tvb投訴裏面有佢哋嘅版權片段。咦？乜原來佢哋買埋《精武門》咩？真係唔知喎～！我哋當然會尊重版權啦，所以製作團隊特別趕工剪咗一個新版，剪輯得好辛苦㗎，大家即刻click入去同我睇10次！」

之後佢又喺社交網留言，指下集推出影片當中嘅幕後花絮，全部由佢由私家攝錄機拍攝，版權歸佢所有：「講明呀，下一集嗰啲幕後花絮，全部係當年我自己部私家攝錄機拍㗎。拍乜都好，我擁有版權。」