黑過鑊底！馮盈盈焗「燶」蛋糕　晒男友視角嘴嘟嘟

藝人馮盈盈年初時傳與緋聞男友鄭衍峰分手，適逢今日白色情人節，佢孤伶伶1個人整蛋糕度過！

佢喺社交網上載一段整蛋糕嘅影片，親手炮製Basque Burnt Cheesecake（巴斯克芝士蛋糕），過程中佢雞手鴨腳，一開始就已經差啲倒瀉糖，之後從焗爐拎製成品出嚟時，焦黑一片，不過其實呢個係蛋糕嘅特色，佢就強調冇焗燶：「呢個cheesecake個特點就係，個表面係燶燶哋嘅，焦香吖嘛！所以有呢個脆脆哋嘅面係好正常，我絕對冇焗燶到，係成功嘅唔係失敗！」佢臨尾將蛋糕放入雪櫃時幾乎整跌，雖然製成品外表唔太靚，但佢以男友視角嘟嘴隔空餵大家贏番唔少分，而助手試食後都大讚好味！