海底求婚好浪漫 李施嬅細數未婚夫6大優點

2021年03月15日 20:01
東網電視
更多新聞短片
藝人李施嬅宣布和星級健身教練車崇健(Anson Cha)的婚訊後,今日首次現身公開活動,講到婚禮籌備情況,她坦言仍未進行:「因為媽咪喺加拿大,搞婚禮要睇疫情發展,而未婚夫屋企人喺美國,所以暫時未知道婚禮會喺邊度搞,都希望喺香港舉行,希望今年內,否則就下年。(會唔會先註冊?)註唔註冊,結唔結婚對我哋嚟講唔係好着緊,搞都只係為家人,因為我哋已經認定對方,知道係Forever。我作為藝人喺劇中結過好多次婚,真係想簡單啲,家人開心就得。點搞要徵求家人意見,長輩最重要。」
她指家姐最近亦宣布結婚,還比她早定婚期,笑言爸爸一次過嫁晒兩個女,非常開心。講到求婚經過,她指對方很有心思:「我哋去美國潛水嘅時候,佢喺水底向我求婚,佢攞戒指出嚟幫我戴。佢知我鍾意海,求婚嘅時候身邊有好多鯊魚,我覺得佢係一個好男仔。」
施嬅稱兩人拍拖4年,只有約8位閨蜜知情,她一直想公開兩人關係,但未婚夫Anson是圈外人,怕嚇親對方,直至近日被東網影到及揭發身份,她笑言:「影到之後,有日Anson去茶餐廳,所有人都即刻恭喜佢,搞到佢面都紅晒,好驚,佢打電話同我講,我話你仲紅過我。佢有啲緊張,畀啲時間佢慢慢嚟。」
講到Anson是星級教練,郭富城及楊千嬅也是其學生,她大讚:「佢係好叻嘅教練,好多學生,佢係香港最叻嘅教練。不過我唔係佢學生,佢同學生撻唔着,因為佢教學生有啲mean,如果佢教我,我哋會鬧交。」她澄清兩人由圈外人介紹,而非圈中人。問到Anson的優點時,她滔滔不絕說:「佢個人好簡單、細心,好錫我、上進又勤力,佢好支持我追求夢想同工作,冇阻止我喺呢行發展,佢鍾意叻同勤力嘅人,佢唔鍾意懶人,所以未來一世我都要好勤力。(造人方面會唔會一樣勤力? )順其自然啦,我都好鍾意小朋友,但唔會刻意,暫時玩住陳山聰同埋胡杏兒嘅小朋友先囉。(係咪已同居?)大家各自有自己嘅屋,但算係半同居狀態。」至於白色情人節如何慶祝?她稱對方很簡單,甚至不知道這個節日,認為只要開心,日日都是情人節。
另外,對於有網民起底指Anson是人生教練Brian Cha的胞弟,施嬅表示不會回應:「因為會沒完沒了,唔好搞到其他人,佢嘅事唔回應。」至於身為健身教練的Anson可有受到近日「健身群組」影響?她表示對方很愛乾淨,並每日進行檢測,對他相當信任,又讚他有責任感。