利穎怡擊退紅疹復工主持《東張》　騷Quali晒流利英文

無綫節目《東張西望》小花利穎怡早前濕疹復發，全身布滿紅疹，被迫即時停工。事隔一星期，原來佢已經靜悄悄全面復工。日前（13日）播出嘅一集《東》，佢出外景到街頭採訪，見其紅疹已經消退，皮膚回復光滑。

其中佢訪問外籍瑜伽導師，問到會否擔心健身中心受疫情影響再次停業時，佢就大晒流利英文，與對方對答如流，而且冇港式口音！其實佢曾於加拿大讀書，並畢業於多倫多大學，難怪英文咁好！