張栢芝練舞受傷死頂　楊丞琳不近人情驚佢累全家

內地真人騷《乘風破浪的姐姐2》成為熱話，一眾「姐姐」更加人氣急升，就連導師那英都成為談論焦點。而張栢芝確定加入後，就一直都係風頭躉，無論佢嘅演出、身形、甚至係胳肋底都被指指點點，成為話題女王。

栢芝性格不嬲唔輸得，佢希望每個演出都有進步，喺《浪姐2》嘅預告片中，因為練舞搞到受傷，佢並冇休息落嚟，死頂吊住手臂繼續排練，邊跳邊露出痛苦表情，粉絲睇到都心痛。

不過佢嘅努力，似乎唔係好得到同隊嘅楊丞琳認同，見狀仲一臉不滿，擔心栢芝會拖大家後腿。有網民話栢芝已經咁努力，仲要傷埋，楊丞琳好似不太近人情喎！