王祖藍辭演古裝新劇　全力搞綜藝！

無綫首席創意官王祖藍原本4月回巢無綫拍攝古裝喜劇，不過據知他因要協助副總經理曾志偉完成綜藝節目改革，一時分身不暇，所以已正式辭演。他接受東網訪問時說：「暫時綜藝呢邊比較忙，想專心協助獎門人處理綜藝工作先。（諗好橋做咩節目未？）我同獎門人做好分工，先賣個關子先。」

而劇中主角如視后蔡思貝、陳瀅等就未收到消息，思貝謂：「我的確冇聽過，都係好被動咁等消息。」問到未能與祖藍合作會否感失望？她謂：「如果佢真係唔拍，佢一定會有更好嘅安排喺計劃入面，我都係等公司安排，任何安排都係好嘅。」而陳瀅則表示：「我剩係知道劇名、監製係邊個同幾時拍攝，不過演員調動都係常見嘅事，不嬲都係開會前先決定，所以我乜都未知，但我對呢套劇都好期待，一來我未拍過古裝，二來我好鍾意拍喜劇，都好興奮！」