魔音李佳芯恨開音樂會：我幾鍾意唱歌！

由李佳芯（Ali）主演的《愛美麗狂想曲》將在下周一（22日）播出，Ali趁未開始忙宣傳工作，不忘派褔利給粉絲，因疫情關係，日前舉行線上粉絲見面會，同粉絲隔空「聚會」一個多小時。

期間她透露未來大計，稱有意開設個人影片頻道，以及期望將來有機會舉辦小型音樂會：「Mini Concert呢樣嘢幾好，我幾鍾意唱歌。演戲以外，唱歌係表達自己情緒、或想講嘅嘢嘅一個途徑。想喺呢方面再落多啲苦功，我有繼續練唱歌，有機會都想唱畀大家聽。希望會唱得好啲，同大家會支持。」一班粉絲聽到後都話好期待！

話說她曾因登台時獻唱《小幸運》並走音，被封為「魔音佳芯」，未知她如果舉行音樂會，會否再唱「代表作」，喺邊度跌低，就喺邊度起返身！