鍾舒漫戥吳浩康開心　李昭南向郭思琳過招

吳浩康於情場見慣風浪，戰績亦相當彪炳，一眾舊愛均有樣貌、有身材亦有家底，不過分手時幾乎個個最後都不歡而散，未能再見亦是朋友。如上一任「康女郎」就是「咪神」崔碧珈，不足1年便「閃分」，雖然他已於社交網認低威，但未獲女方原諒之餘，還反被寸爆「扮上進」及「大話精」，火藥味甚濃。

早年處於事業低潮的他，曾與胡定欣拍拖，女方不但未有離棄，更有傳曾代他找卡數，惟戀情僅維持5年便告終，有指是因女星莊思敏介入。

之後他分別與師妹鍾舒漫及李昭南相戀，前者更發展至談婚論嫁階段，但臨門一腳男方被爆「偷食」而煞停婚事，不過由於2人已分手多年，鍾舒漫亦有穩定的另一半，面對舊愛有新戀情亦大方送祝福，她接受東網訪問時說：「好簡單，就係戥佢開心，祝福佢有新戀情啦！」

而李昭南則表示不知道他拍拖，稱已有一段時間沒有聯絡：「係咩？我真係唔知，如果係，祝福佢呀！（有冇做康女郎秘訣？）每個人相處方式唔同，我諗最緊要係大家相處舒服，祝福佢啦！」