走出10年楊思琦陰霾！李泳豪新歡賢良淑德識行奶奶政策

李家鼎細仔李泳豪於2011年被楊思琦狠心背叛，翌年雖然曾經同洪天明舊愛、中韓混血兒Miki有過一段情，不過只係曇花一現，之後一直單身。據知，李泳豪終守得雲開，走出楊思琦陰霾，幾個月前撻着來自台灣嘅新歡Agnes。Agnes同佢之前嘅女友完全唔同，賢良淑德，一早識行奶奶政策，氹得「未來奶奶」施明鬼咁開心，仲不時喺自己社交網為「未來老爺」李家鼎宣傳，認真識做。

據知李泳豪同Agnes同樣都係愛犬之人，一拍即合！Agnes亦相當識做，唔介意拍拖同施明、李泳豪姪仔（阿哥李泳漢4歲囝囝Alfie）4人行，李家上下都對Agnes讚不絕口，李家鼎同施明更希望已40歲嘅李泳豪快啲成家立室，刷定牙飲新抱茶。

李泳豪受訪時透露同女友拍拖個半月左右，但佢唔願多講女方背景，只係話對方係台灣人：「佢屋企係做生意嘅，佢爸爸媽媽喺台灣住，其他嘢唔想講太多。（爸爸、媽媽都好喜歡佢？）係呀，佢乜嘢都好好，愛整潔、廚藝又叻，可以同鼎爺（李家鼎）有話題。（同你媽咪呢？）仲多嘢傾，因為佢哋見過好多次，已經係閨蜜，講女人經話題，有時啲話題仲唔畀我知添。」因為啱啱拍拖冇耐，結婚就言之尚早，但泳豪就話以此為目標！而父親有向佢催婚，佢話：「媽咪都緊張，但爸爸仲緊張，都有催我，但呢啲嘢冇得急，慢慢了解下先。」舊愛楊思琦送上祝福：「祝福每一位都開心、幸福、平安！」

東網致電李家鼎，佢話已見過Agnes，大讚對方係好女仔，仲好尊重老人家，問係咪已認定對方係新抱仔？佢話：「唔一定，佢哋只剛開始冇耐，不過我有同佢食過飯，佢為人真係好細心！」係咪想個仔快啲成家立室？李家鼎話：「唔好話咩年紀，我係老人家，都想啲仔快啲結婚，唔好兩頭遊，不過個女仔真係幾好！」

至於楊思琦於2011年搭上吳帥，隔一年就生埋女，不過佢同吳帥終分手收場。直到去年佢再誕下一子，但佢蛇咬都唔肯透露邊個係兒子經手人。