疫下首個放寬場地演唱會　帶菌者做足檢測唔戴罩

樂隊Carrier帶菌者籌備7年的首個演唱會晚上在九龍灣舉行，成為疫情下首個放寬場地的演唱會，座位開放5成，300個座位全爆滿，入場觀眾都需要量度體溫，座位4人一組，觀眾規定全程戴口罩，不能飲食外，亦不能站立。帶菌者表示心情十分緊張，之前一直擔心演唱會受疫情影響，他們每日睇住確診數字，前一晚忙到冇得瞓，幾日前己做定病毒檢測，台上可以不用戴口罩，以前做蒙面歌手的小菌講笑說：「不過我都戴慣罩。」

帶菌者透露今日有特別意思：「3年前今日第一隻派台歌，3年後今日推出我哋第一隻CD。」他們並正式宣布簽約新公司，成為公司首支樂隊，笑言做「一哥」，但好多嘢都是自己做，監製是自己，助手都是自己。問到收入有望增加，主音龍小菌說：「好多未知，好難好大收入，但相信公司可以幫我哋接觸唔同嘅範疇。（起碼保證有收入？）係畀到最大嘅音樂支持和人脈最重要。」