相隔29年！蘭子禾輋邨重唱《金絲雀》　被街坊鬧爆？

藝人陳淑蘭（蘭子）1992年喺電影《家有囍事》入面，演出一場「進駐」黃百鳴家後喺張床度「典嚟典去」唱《金絲雀》嘅戲份，呢個經典場面相信大家都唔會唔記得。事隔29年，佢再開金口唱《金絲雀》！佢喺社交網上載一條名為《自言自語自唱自拍在禾輋邨》嘅片段，片中見佢着住短袖花恤衫、外披啡色背心外套，喺樓層上公然大聲獻唱仲不停轉圈，唱完後仲豎起手指公自讚：「嘩，勁呀！」

不過佢獻唱期間見到樓下街坊對佢行徑投以奇怪目光，有網民留言指：「我聽到有街坊鬧你，叫你唔好嘈喎……」蘭子亦親回：「你要驗耳，佢哋讚我靚。」佢仲笑言下次會喺紅館獻唱呀！