王菀之搞個人藝術展晒超聲波相：係我嚟㗎

歌手王菀之（Ivana）到銅鑼灣出席個人創作的藝術展，表示為了新歌《the Pink Room》而舉辦這個展覽，其中自己包辦全首歌的曲詞編監唱是第1部曲，第2部曲就是MV兼虛擬藝術展，第3部曲就是這個實體展，全部共籌備了9個月時間。

她透露新歌講述標籤文化：「本來標籤係畀大家幫物品分類，但依家變咗將人同人分類，變得不平等。」問到可試過被人標籤？她笑言：「冇嘅，不過朋友叫我『肥妹』囉，但係都幾可愛嘅，或者大家會覺得我怪囉，但識我嘅人都唔覺得我怪，我都唔知我邊度怪。（老公Eric So覺得你呢？）佢唔會形容我，只會靜靜觀察，冇出聲形容，我又冇問，淨係睇佢眉頭眼額。」

她亦透露老公有為展覽幫手：「製作上有畀意見，我好信任佢嘅藝術眼光同意見。」講到有幅作品似超聲波相片，她笑言：「嗰啲係光，係我嚟㗎。」她亦透露多得有個熱心藝術的朋友資助她舉行此藝術展，公司亦有資助之前虛擬藝術展。