簡淑兒偷拍男神醜態　朱敏瀚麥大力隨時「復仇」

「仙氣女神」簡淑兒（Jessica）近日同朱敏瀚同麥大力一齊拍節目，平時見2位男神都係以cool爆靚仔look登場，但呢日Jessica就喺社交平台玩大踢爆，先Po出一張3人嘅正常合照，見到3位俊男美女以「嬲」字排排坐，但轉個頭佢就出賣2個靚仔，大晒佢哋嘅瞓覺相！

不過男神當然瞓覺都靚仔過人，力保靚樣不失，但Jessica就認真貪玩，自拍時仲擺隻食指喺麥大力個鼻度扮幫佢「撩鼻屎」！佢仲抵死留言：「你哋眼中嘅男神s VS 我眼中你哋嘅男神s」，仲hashtag撩交打系列。

一眾網友笑到反肚，朱敏瀚見到即留言反擊：「你係咪唔記得我都有1張？」搞到佢即刻耍冧：「我不嬲都話你係最高大威猛、英俊瀟灑、有型大方，又唔記仇架！」麥大力都留言：「hahahaha, just wait」睇嚟女神都有痛腳畀人捉住！