啱啱咀完小鮮肉　馬思純傳上樂隊主唱屋企過夜

33歲大陸女星馬思純近日同細佢6歲嘅小鮮肉演員白敬亭主演大陸劇《你是我的城池營壘》，「姐弟戀」隨即爆紅，當中馬思純更奪走白敬亭嘅螢幕初吻，搞到粉絲嗌晒救命，仲上埋熱搜。點知今日就有大陸媒體爆出馬思純同神秘男十指緊扣現身，仲齊齊上樓過夜，疑似戀情曝光。

有指今次同馬思純上樓嘅男子，係樂隊盤尼西林主唱張哲軒，對方比馬思純細4歲，更傳係馬思純好友竇靖童介紹2人認識，目前馬思純同張哲軒都未有回應，2人是否戀愛關係都未有確認。但好多劇集粉絲就已經話心碎，指依家對馬思純同白敬亭會否「戲假情真」冇晒幻想，分分鐘仲會影響新劇收視。