「籃球女神」方泳琳入圍口罩小姐：我真係好靚！

ViuTV嘅另類選美節目《最後一屆口罩小姐選舉》去到第2集，繼續進行海選環節，因只剩9個名額，未出場嘅參賽者出盡「奶力」表演。94號參賽者賽前被網民認出係有「籃球女神」之稱嘅方泳琳，上報係演員，因為係最後3位參賽者出場，基本上4位評判已經揀齊隊員，佢即自誇：「我真係好靚！戴唔戴口罩都靚。」成功令其中一位評判發動換人牌，成為最後一位入圍「佳麗」。

話係自由工作者嘅53號參賽者就表演跳舞，起初都係跳日系風，點知去到後一Part，突然除剩件Sports Bra搔首弄姿，睇到啲評判嘩嘩聲！雖然整體表現未如理想，被評判笑似連鎖麵店啲落單姐姐多啲，但都成功入圍！

56號參賽者報稱係KOL嘅參賽者，身穿瑜伽服，露腰表演花式跳繩吸引評判。同樣着瑜伽服嘅92號，玩花式呼拉圈，谷胸上陣明顯吸睛啲！60號參賽者自稱係Model嘅參賽者表演做戲，一人分飾兩角之餘，又扮狗吠，引起評判注意！