【聽力題】謝安琪囡囡4歲牛一　有幾多把聲唱生日歌？

尋日（23日）係張繼聰同謝安琪囡囡張靖（Karina）4歲生日，咁開心嘅日子，梗係要一大班人慶祝啦！不過依家仲有禁聚令，佢哋就為Karina喺屋企搞生日會，咁仲Warm啦！

張繼聰就將唱生日歌嘅片段放上社交網開心Share，現場聽到好多把聲喺度唱「Happy Birthday To You」，Karina就跟住拍手一齊唱，因為「聲疊聲」關係，連謝安琪都不禁留言：「成家人究竟唱咗幾多個Key出嚟？」

時間過得真快，Karina愈大愈精靈，佢仲有乃父風範，唱完生日歌好識做咁向大家鞠躬致謝，唔少網民都話好家教呀！