BLACK PINK經理人Follow李元元　做女團不是夢！

藝人李璨琛嘅囡囡李元元（Lucy）表演慾強，近期仲勁跳韓國女團BLACK PINK嘅歌，跳到衝出香港，成功令BLACK PINK經理人欣賞，仲轉載到去自己個社交網，令「Lu媽」梁志瑩勁開心！

咁都未夠，BLACK PINK經理人仲add咗Lucy做朋友，Lu媽玩食字，笑言今次Lucy做「女豚」（女團）不是夢，未開學讀書就要準備退學：「BLACK PINK個經理人follow左（咗）Lucy，呢單野（嘢），真係做女豚（團）不再是夢 #今次真係攞埋個金針獎 #未開學已經準備要退學了」唔少網友同Lu媽一樣咁興奮，仲笑言叫Lu媽學定韓文，仲話Lucy係「史上最年輕練習生」。

李璨琛接受東網訪問，指Lucy嘅粉絲遍布世界各地：「我當然好開心Lucy可以帶给大家歡樂啦哈哈！至於BLACK PINK嘅經理人，應該都係覺得肥Lu好笑，先至會同其他粉絲一樣畀like同follow啫。其實肥Lu嘅粉絲都幾國際㗎，上次我哋一家人去峇里島旅行，揼骨嗰個阿姐都係肥Lu啲fans嚟㗎，見到肥lu突然叫：『Lucy OMG（Oh my god） you're so cute！』」。