莫文蔚為張國榮推Job做足20場演唱會嘉賓：畀錢都買唔到

歌手莫文蔚（Karen）將於4月1日參加悼念已故巨星「哥哥」張國榮嘅直播音樂會，屆時佢會獻唱哥哥嘅其中2首經典金曲，未演出先興奮嘅佢大叫期待︰「仲要係一個咁特別嘅日子，做啲咁Positive、有意義嘅事，音樂就係永遠都帶到畀人正能量。」佢又話仍然好記得當年第一眼見到哥哥嘅感覺，簡直係過目不忘︰「深深咁記住張國榮呢個人，佢會令你好舒服，唔會因為係對住個巨星而有隔膜、怯晒，所以喺佢身上真係學咗好多嘢。」

Karen又特別難忘被哥哥邀請做演唱會嘉賓，仲要唔淨止係唱一場，晚晚都偷師︰「唱足佢嗰次香港站嘅20幾場﹗嗰段時間我推晒所有嘢，淨係專心做哥哥個嘉賓，日日都跟住佢之後踩台，就好似做咗個學師仔咁，觀察佢每日點準備個騷，呢啲真係你畀錢都買唔到，觀察到佢有好多執着、要求，絕對係影響咗我做歌手。」