疫情集中拍劇　周柏豪不忘音樂事業預告會搞巡唱

歌手周柏豪出席電台節目活動，透露拍攝無綫新劇《法證先鋒V》前，先拍攝無綫另一套時裝劇，不過為保持神秘感，故事及對手演員先大賣關子：「呢位演員喺音樂上合作過，電視係第1次，故事係比較懸疑，我個角色有一半係暖男，其實自從《多功能老婆》後都有年幾、兩年冇拍無綫劇。」更指疫情關係會先集中拍劇，音樂方面雖然已錄了10首歌，但一直未有機會派台及與歌迷搞活動，所以靜待適當時機才推出。

談到星夢娛樂已改朝換代，他表示人事變動未有影響其工作：「從來周柏豪冇任何負面影響，反而有更多機會同唔同人合作，之前同曾志偉、何麗全同樂小姐（樂易玲）都見面傾咗偈，嚟緊方向都係巡唱、拍劇同出碟。（同你派定心丸？）覺得唔係外界講得咁得人驚，從來我都係等緊見面機會，睇吓高層有乜安排，上市公司會善用員工，人事變動每間公司總會有。」