譚詠麟同志偉密密傾電話　望搞好香港樂壇

貴為明星足球隊領隊兼主席的譚詠麟（阿倫），今日為電台新足球節目造勢，以一身運動裝束上陣，席間更大顯身手晒腳法。雖然其父親是足球名宿，但他自爆小時候被父親下令不能接觸足球：「佢話我太瘦弱，驚人哋踢親我。」不過他愈被禁止就愈要踢，中學時期一放學就偷偷去踢波：「因為個場地係瀝青地，1個星期就踢爛1對白飯魚，所以最後就畀老竇發現咗。」又謂已支持本地足球隊幾十年，同時大讚外國球隊的青訓做得好好，例如荷蘭盛產出色球員，相信因其青訓做得佳。

阿倫表示有接近2年沒有出席公開場合活動，去年只有參與1個活動以及去內地100日拍節目，問到是否賺好多？他笑話：「講呢樣嘢！起碼有得做、有寄託。」講到老友曾志偉返無綫做高層，問有被邀請做節目或嘉賓？他指若然對方有需要，都會義不容辭，並透露雙方講電話講得好密，問到是否做智囊團？他說：「佢問我我咪提吓佢，有同佢講一定要做番啲音樂節目，喺以前嘅華人社會，所有資訊都係由香港發出，希望做好香港樂壇、香港音樂，唔好分咩區別、同你台我台，最緊要大家齊心。（但有合約綑綁。）一次半次有咩所謂！我咩台都有睇，有留意新一代嘅年輕歌手。」

讚姜濤大方

講到他特別有留意姜濤，更專登於社交平台出Post，大讚對方處理被惡搞一事大方得體：「好少見到啲後生仔咁大方，佢嘅EQ拍得住我。（你點睇無綫呢件惡搞事？）笑吓啫！相信姜濤都唔會擺喺心入面。（但佢啲Fans擺咗喺個心度。）一定㗎啦！叫佢哋唔好諗埋一邊啦，但啲Fans諗埋一邊我都慣咗。」

惟阿倫出名是「燈神」，問到有否睇到網民指他讚姜濤等於「燈死」對方？阿倫說：「你傻啦！你睇李克勤做得幾好，但可能佢大器晚成，姜濤就一點就明，早年我都有讚G.E.M.（鄧紫棋）同Eason（陳奕迅），佢哋咪發展得幾好，嗰陣又唔見你哋都講。（佢哋最近都有小風波喎。）風波就一定，如果唔係就唔叫娛樂圈，做娛樂圈就一定有風波，係咁容易『燈』死人，就『燈』死咗好多人啦！死而不『姜』呀！」他坦言早於前年主動關閉某社交平台：「唔想睇到啲唔想睇嘅嘢，但睇咗又唔會唔開心，只係明白唔係有咁多人都會同你有一樣嘅意見同想法。」