麥明詩Deep V同「下世情人」見面：Love this guy

前港姐冠軍麥明詩（Louisa）雖然已淡出幕前，但一舉一動都仍然好受大家關注，近排佢就同前機師盛勁為傳緋聞，戀情疑幻似真。呢日佢就喺社交平台大晒同1位男性嘅合照，仲留言：「Love this guy」，以為佢要公開戀情？錯啦，望真啲原來係同佢感情好好嘅哥哥咋！

見佢哋打扮到行一行出席宴會，Louisa仲身穿露膊低胸晚裝上陣，大騷強勁事業線！抵死嘅佢知道自己惹火多新聞，驚大家唔認得係佢哥哥，所以特登hashtag寫明「前世情人」、「哥哥」、「舊照」、「一定要講明」，費事大家見到誤會佢有男友，同埋疫情期間仲有聚會。

一眾網友當然唔放過留言機會，有口痕網友仲幫佢諗定條新聞標題：「麥明詩露半球與型男面貼面合照」，又有網友突破盲腸：「唔係爸爸先係前世情人？」，搞到Louisa反問：「咁阿哥係下世情人？」認真搞笑！