淡定唔郁又唔喊　倪晨曦囝囝變光頭關阿媽事

索媽倪晨曦（Elva）嘅囝囝Virgil喺舊年11月頭出世，萬千寵愛於一身，做咗3個多月人仔之後嚟個剪髮初體驗，仲要係由父母親自操刀，Elva將成個過程影低再放喺社交平台開心Share！

一開始就見Virgil萌爆咁坐喺Baby Seat上面，一直被玩具分散注意力，睇嚟仲未知道「大禍臨頭」，而Elva就拎住個理髮器蠢蠢欲動，瞄準囝囝個頭搵機會郁手，成功落手後即刻好有成功感咁笑咗出嚟，雖然睇落手勢生疏，但落刀嗰吓都叫做有板有眼，再剃多幾刀之後就交畀老公接力，至於Virgil繼續淡定唔郁、又唔喊，相當合作！唔使好耐佢就變咗個光頭仔，不過仍然Keep到咁可愛同靚仔，顏值高企！