馬國明大文豪上身Po飛機文冧女　湯洛雯反應係…

熱戀熱辣辣，馬國明自從同湯洛雯拍拖後，成個人都變晒，除咗破天荒開社交平台之外，仲開始識得出post冧吓女友。為咗無綫新劇《白色強人II》，孭重飛嘅馬國明被迫同湯洛雯異地相隔，要去深圳拍攝，點知去完深圳，仲要飛埋去上海。搵錢緊要，靚湯都一樣重要，去到邊都掛住女友嘅馬國明，搭飛機時見到舊雲，又再諗起靚湯，即刻做嘢出Post：「今日飛上海...飛的感覺。」

平時直到唔直嘅馬國明，突然大文豪上身，寫咗呢篇飛機Post，有超過2萬人Like，陳敏之同陳山聰等老友都有留言。雖然佢冇寫明飛嘅感覺係咩，但當有網民發現，原來張相係心型雲海時，馬國明即刻覆：「你都見到...」咁又係呀，點解連網民都見到，靚湯竟然睇唔到？靚湯好似失咗蹤咁，冇留言冇畀Like，唔怪得馬國明同網民講「你都見到...」啦，啲省略號完全代表佢嘅失落。