自稱係馮盈盈「港大師姐」嘅2019年落選港姐楊慧敏，近日參加ViuTV舉行的《最後一屆口罩小姐選舉》，是非多多，不單被指疑違犯禁聚令，跟廿多個朋友在酒店套房開P外，喺《最》嘅表現更被網民狂轟同力數3宗罪，明顯觀眾緣麻麻。楊慧敏疑似頂唔住網民嘅批評，企圖服食殺蟲藥飲漂白水自殺！

楊慧敏喺社交網上載相片，見到有殺蟲藥同紙巾等，佢發文話自己做咗件蠢事，本來計劃先食殺蟲藥，再飲漂白水，不過食咗一啖覺得好難受，即刻吐番出嚟。佢話：「我並不是想結束生命，因為我有愛我的家人和朋友，我不想他們內疚及後悔。我只是想痛苦消失。」佢更話想今晚開Live，邀請網民分享人生低潮，同埋提醒佢有乜可以改進嘅地方之外，今午再發文稱令大家擔心，感到十分抱歉，又說不會再重蹈覆轍。

講番網民數楊慧敏嘅3宗罪，第一係「強調自己好有錢」：喺節目入面佢標榜自己係有錢人，除咗不時晒名牌，其中一集一班參賽者要入街市拍攝，不過佢就一臉嫌棄話自己戴晒鑽石戒指唔適合入街市，仲話佢成世人去街市都唔超過10次。

第二係「不停放生電」：網民指佢對住任何男生，都唔放過放生電嘅機會，就算去街市燒味檔學斬雞時，連中年檔主都唔放過。第三係「博出位」：喺拍片賣廣告環節，佢多次玩軟骨功大擺奇特Pose嚟玩突出。基於上述3大原因，令到唔少網民喺節目組社交網頁留言，話唔踢楊慧敏出局，會罷睇節目。

防止自殺求助熱線：

香港撒瑪利亞防止自殺會： 2389 2222

生命熱線： 2382 0000

明愛向晴軒： 18288

社會福利署： 2343 2255

撒瑪利亞會熱線(多種語言)： 2896 0000

東華三院芷若園： 18281

醫管局精神健康專線： 2466 7350

利民會： 3512 2626

賽馬會青少年情緒健康網上支援平台「Open噏」： http://www.openup.hk