東方日報C1:JW衰心軟原諒賤男 譚嘉儀專一急撇叛侶

2021年04月03日 03:30
東網電視
更多新聞短片
歌手JW(王灝兒)曾受感情重創,遇着幾位前度都偷食,認真慘情!但她見過鬼仍不怕黑,更衰心軟,以為可以改變男友,原諒了對方又再一起,但最後只換來再次被背叛!至於譚嘉儀亦曾遇上花心賤男,但她有截然不同的睇法,直言完全接受不到,認為一次不忠,百次不用!
JW讀中學時已拍拖,但次數不多,並自爆有不愉快經歷,試過被男友欺騙,雖然接受不到對方偷食,但就衰心軟:「中間一定有心軟、畀人氹到,我諗女仔好多時有個感覺,覺得自己可以改變男友,或者希望佢會因為你而改變,所以會心軟、原諒佢,但最後都係又發生!」
「我唔係易呃」
她自爆幾位前度都試過偷食:「所以嗰啲好快係過去式。(你成日遇人不淑,好易呃?)我唔係易呃,我都幾快發現,我諗係因為細個好多男仔都想識多啲女仔玩吓。(你原諒佢哋?)係呀,個個男仔或女仔細個嗰陣,梗係想經歷愛情唔同嘅嘢,而呢啲經歷都令我慢慢累積經驗,每次都會上咗一課,變咗更好嘅人!」
曾是黐身女友
經歷多次被背叛,問到可會變得識揀好男友?現有穩定男友Tarzan的她坦言:「唔可以話識揀,依家呢個都係緣分,喺啱嘅時候遇到呢個人。」並直認以前是黐身女朋友,經常Check男友行蹤:「細個男仔都鍾意玩,信任一定冇咁多,但依家大個咗,大家都定落嚟,最寶貴係信任。同埋依家唔需要太黐身,因為同男友嘅朋友圈融合咗。」
自認戀愛經驗少的譚嘉儀,對上一段戀情慘被背叛:「佢完全冇當過我係女朋友,收埋幾個女仔,不斷喺電話調情。拍咗拖2、3個月,有晚深夜有啲女仔搵佢,佢個樣即刻好驚青,唔使問都已經估到,之後佢就突然失蹤!佢平時做到自己好誠實,好似咩都同你講,但原來真實係咁,反差太大,本身對佢期望好高,之後跌到好低。」
「我思想傳統」
嘉儀直言完全接受不到男友偷食:「一次不忠,百次不用,我思想比較傳統,要一心一意對一個人。(就算佢求你都唔會心軟?)唔會,如果愛一個人,點會做呢啲嘢傷害佢?」
唔Check行蹤
嘉儀坦言自此有陰影,有段時間不敢拍拖:「嗰排對愛情完全冇晒信心,覺得以後都唔會搵到自己鍾意嘅人。後尾時間過去,心情都平復咗,睇吓遇唔遇到一個啱嘅人。」嘉儀自認不算黐身女友,更不會Check男友行蹤:「可能開頭會緊張啲,但信任咗佢之後,過咗一排就會知佢個人係點,就會好放心,可能佢要做嘢,唔見咗幾個鐘,都唔會覺得出奇。」
更多新聞,請瀏覽東方日報網頁: