【方力申都係客】JW封邊個做「Plant King」？

歌手JW近來除咗愛入廚，仲鍾意種植，佢喺社交網上載去買盆栽嘅照片，留言：「呢排真係好鍾意買盆栽，一買買咗5、6盆。」原來佢去咗幫襯剛宣布拆夥嘅組合天堂鳥成員歐鎮源（Tyrese），仲好識做大讚啲盆栽好靚，Tyrese都留言：「Thank You So Much！」睇怕都有打個靚折頭畀JW啦？

而方力申都留言表示，屋企9成植物都係向Tyrese買，難怪Tyrese講過拆夥後會專注幫家人打理園藝事業，有咁多圈中朋友撐佢唔休搵唔到食，連JW都封佢做「plant king」（植物之王）。