Gordon露營初體驗漏低背囊　隔空叫董嘉儀Join

早前宣布解散的組合天堂鳥（BOP）成員Gordon獻出露營初體驗，日前與朋友到西灣村露營，他表示自從在電視睇完露營節目後，又見到很多朋友去露營，故一直都心思思很想參與，直至今次聽到朋友計劃露營，故即第1個舉手參加。有份準備食物的他大讚豪華又好味：「有鮑魚，鵝肝，帶子，牛扒，青口等，山長水遠，長途跋涉入到咁偏僻嘅地方，成班人一齊煮呢啲美食，簡直係享受人生！」

但他透露由於在沙灘紮營，到半夜凌晨時非常大風，完全睡不到：「6點就起咗身，但陰天睇唔到日出，係有啲可惜。」期間發生小插曲，原來回程時他大懵遺下了背囊：「行咗1個鐘出返去西灣亭休息陣，就轉的士返屋企，點知返到屋企樓下先發現個背囊漏咗喺個亭度！好彩背囊入面嘅嘢唔係貴重嘢，所以唔返去拎，惟有畀個藉口自己新一年送舊迎新啦！」問到下次可會叫埋緋聞女友「大埔LuLu」董嘉儀一起露營？他坦言：「我想多次camping，可以多啲人一齊玩，唱歌，食哩，放鬆吓心情，如果佢到時得閒我唔介意佢join呀！」