遺傳超強演藝基因　谷祖琳唔介意兩女入行

藝人谷祖琳為舞蹈學校開幕任剪綵嘉賓，自言不是虎媽的她，透露兩個女兒均有表演欲，故報讀興趣班較多：「大女鍾意唱歌，細女就演戲，都幾有天分。細女之前就拍慈善電影，因為陳嘉上導演想搵個似男仔嘅女仔拍，我覺得個女適合就畀佢試吓！點知佢喺片場又好淡定，又學大人睇Playback，仲主動話可以嚟多Take。」

而除了跳舞，兩個女兒也有學習拍攝技巧，平日也會偷偷用其手機拍片，她說：「有試過自己作曲作詞，拍完唔記得刪片，亦試過偷拍我，之後放喺屋企手機群組。（畀唔畀佢哋入行？）咁我自己都係演員，都係一份工作，冇所謂，但就唔會刻意帶佢去試鏡，始終要佢鍾意，同埋唔影響學業為大前提。」