方紹聰談性話題！蘇可欣嗌尷尬：唔知會唔會刪走

藝人吳紫韻（Purple）與蘇可欣（Eunice）為無綫節目《野外步出》任嘉賓，雖然密實打扮到大帽山遠足，睇頭欠奉，但主持方紹聰卻出招搶Fo，以心理測驗角度與兩女談性話題，Eunice被嚇到呆滯：「都幾尷尬，我呆望住Purple，冇諗到有呢個話題，唔知最後會唔會刪走咗！」

而Purple則表示：「我哋另類搶鏡，不過內容都唔會好深入，都係問對性嘅睇法，我又唔係太尷尬，平時自己都會同女仔朋友傾，今次只係男仔問啫，不過我個答案對呢方面唔係好大需求。」更指拍攝當日天氣突然變差，既落雨又凍又大霧，感覺如拍鬼片般，故最後攝製組也提早收隊。