白衣天使唔易做　何沛珈難忘安慰癌症病人

無綫《東張西望》主持何沛珈（前名何孟珊）日前為節目《#一屋後生仔》擔任嘉賓，今次佢同大家分享做護士經歷，佢最難忘一次係安慰一個癌症病人，佢話：「嗰時啱啱做護士，好多嘢未放手畀我做，覺得好無力。個病人係癌症病人，佢做完檢查返番上房，佢係咁話好痛好痛，但我又幫唔到佢啲乜嘢，高級啲嘅同事又未得閒幫佢，最後病人家人不斷投訴，我只好報告畀其他人知，而我就繼續返入去安撫佢哋。」因為醫生開藥都要時間，期間沛珈要不斷安撫佢哋做心靈輔導，對病人都好有幫助。白衣天使果然唔易做，網友都大讚沛珈好有愛心。