細細個就有電眼！梁朝偉勁百厭　跌落樓梯撼穿頭

尋日4月4日係兒童節，TVB社交網專頁整咗條片，同大家分享藝人們嘅童年照！片中有1997年佘詩曼接受節目《城市追撃》訪問，當時佢晒咗張童年照，主持話一睇就估到係佢：「個樣似囉，冇咩點變！」阿佘細細個就好可愛，真係由細靚到大㗎！

之後再睇吓鄭伊健嘅童年照，見佢非常精靈可愛！佢自爆嘅瘀事，細個時佢會着西裝去拜年，之後去咗踩Roller，點知玩到條褲爆呔，搞到要匿埋喺廁所密密縫呀！

影帝梁朝偉細個咩樣，大家見過未先？今次就有機會喇！佢細細個時已經有電眼，真係電死人㗎！原來佢細個時好百厭，有一次畀同學仔推咗落樓梯，搞到額頭都穿埋，依家仲有疤痕！