余德丞丁子朗被「小三」介入HeHe情

藝人余德丞（Dickson）及丁子朗日前為無綫新劇《青春不要臉》開工，雖然他們是首次合作拍劇，但戲裏戲外都已成好兄弟，劇中與戴祖儀飾演情侶的子朗笑言：「基本上呢套劇戴祖儀先係我哋嘅第3者，成日介入我哋感情！其實祖儀成日同我投訴，話畀Dickson阻止晒呢段感情。」他又大讚Dickson友善：「有時佢放咗工都好，都會問我今日場戲拍成點，明明佢早收工先都會問我，所以very nice，feel到佢嘅溫暖！」

問到怎樣回禮？Dickson即乘機「屈」對方：「如果我今晚拍到朝早，佢話會買早餐嚟請我食，就算本身瞓緊覺，都會特登起身過嚟。」子朗即笑言：「認真嘅，係就請你食早餐！」Dickson又透露劇中2人是從小就認識的好兄弟：「講我哋奮鬥追夢嘅過程，我為佢爭取好多嘢，佢又幫番我。」又大爆繼踩單車攬腰後，有幕戲會同對方有身體接觸。