迪麗熱巴被批同吳磊冇CP感 　網民：似外甥與阿姨演戲！

「新疆四美」迪麗熱巴主演嘅內地古裝劇《長歌行》成為熱話，繼之前話套劇與歷史不符，熱巴又被插造型唔掂，近日更被網民話佢同細7歲嘅吳磊飾演情侶好有違和感，被嘲CP感唔夠，睇上嚟似外甥與阿姨演戲。

而熱巴尋日（6日）就一於好少理，着住件大露背靚裙同吳磊做直播為新劇宣傳，仲透過工作室喺社交網開心Share靚相。不過內地網友就唔多受落，話睇完直播更確信「真的沒有CP感」！

好多網民留言：「沒CP感，但是熱巴好美！」、「真的不是同輩人感覺！」、「當初找他們演情侶的人是腦子被門夾了嗎！」、「小阿姨帶姪子出來給大家拜年！」、「吳磊和意大利來的大表姊成功會面！」認真慘情！